Тайваниас Монгол улсад суугаа Төлөөлөгчийн газар, Тайваний Соёлын яам, Холбооны Бүгд Найрамдах Герман Улсын Элчин сайдын яам, Монголын урлагийн зөвлөл хамтран Монголын уран зургийн галерейд 9 дахь удаагаа “Улаанбаатар” олон улсын медиа урлагийн наадмыг зохион байгуулж байгаа бөгөөд тус наадмын нээлтийн үйл ажиллагаа энэ (2024) оны 5-р сарын 7-ны өдөр амжилттай болж өндөрлөлөө.
Тайваниас Монгол улсад суугаа Төлөөлөгч Николай Ван хэлсэн үгэндээ “Тус төлөөлөгчийн газар нь Монгол улсад Тайваний соёлын онцлогийг харуулсан төслийг сурталчлахад маш их хүч хөдөлмөр зарцуулж энэхүү олон улсын медиа урлагийн наадамд оролцож байгаа бөгөөд энэ жил хоёр дахь удаагаа Тайваний олон уран бүтээлчид болон Тайваньтай ойр нягт хамтын ажиллагаатай олон улсын уран бүтээлчдийг урьж оролцуулаад байна. Мөн Монголын урлагийн зөвлөл үзэсгэлэнгийн танхимын нэг давхрыг бүхэлд нь Тайваний уран бүтээлчдийн бүтээлийг дэлгэж өгсөн явдалд талархаж байна. Тус төлөөлөгчийн газар нь олон улсын анд нөхөддөө Тайваний соёлыг илүү сайн таниулахын тулд Тайвань хан боргоцойтой бялуу (Taiwan Pineapple Cake), Тайвань бабл тий (Taiwanese Bubble Tea) зэргийг тусгайлан бэлдсэн юм. Тайваний засгийн газрын зүгээс Тайвань Монголын урлагийн салбарын хамтын ажиллагааг үргэлжлүүлэн дэмжиж, хоёр талын уран бүтээлчдийг олон улсын тавцанд гарган гялалзуулахын төлөө ажиллана.” гэв.
Монголын Урлагийн зөвлөлийн Гүйцэтгэх захирал О.Одгэрэл хэлсэн үгэндээ “9 дахь удаагаа “Улаанбаатар” олон улсын медиа урлагийн наадмыг амжилттай зохион байгуулах амаргүй байлаа. Тайвань талаас хоёр жил дараалан тус наадмыг зохион байгуулахад ихээхэн дэмжлэг үзүүлсэн явдалд талархаж байна. Шинэ медиа урлаг нь Монголчуудын хувьд төдийлөн танил болоогүй шинэ ойлголт бөгөөд Тайваний шинэ залуу уран бүтээлчид бага багаар Монгол Улсад нэрээ гаргасаар байгаа бөгөөд Тайвань уран бүтээлчид шинжлэх ухаан, технологийн чадвараар Монгол орны уран бүтээлчидтэй харилцаагаа өргөжүүлж, хоёр талын бүтээлчдийн уран бүтээлээ туурьвах эрч хүчийг нэмэгдүүлнэ гэж найдаж байна.” гэв.
Энэ удаагийн урлагийн наадмын куратороор Германы уран бүтээлч Inga Seidler ажилласан бөгөөд Тайвань, Монгол, Герман, Франц, Словени, АНУ-ын нийт 14 уран бүтээлчийг урин оролцуулж, 13 уран бүтээл дэлгэн үзүүлсэн нь Монголчуудын анхаарлыг ихэд татсан бөгөөд Монгол Улсад суугаа олон орны элчин сайдын яам болон төлөөлөгчийн газрын дэмжлэгтэйгээр хоёр жил дараалан Тайваний соёлын онцлогийг харуулсан тул ихээхэн ач холбогдолтой юм.
Мөн тус медиа урлагийн наадамд Тайваний нэрт уран бүтээлч Чиү Жиэ Сэнь, Чэнь Ю-Рунг, Тайвань гаралтай Америк уран бүтээлч Ван Бо-Янь, Тайваньд амьдардаг Франц уран бүтээлч Марго Гүильемот оролцсон нь тус наадмыг илүү олон улсын шинжтэй болгосон юм. 9 дахь удаагийн “Улаанбаатар” олон улсын медиа урлагийн наадам “Харж буйдаа итгэхүй” сэдвийн дор Монголын уран зургийн галерей болон “Улаан гэр” галерейд 5-р сарын 07-ноос 19-нийг дуустал олон нийтэд нээлттэй толилуулагдах гэж байна.
