Тайваний Цэргийн нэгдсэн 3-р эмнэлэг, Монголын Улсын Нэгдүгээр Төв Эмнэлэгтэй хамтран 3-р сарын 11-ний өдөр “Цусны үүдэл эс шилжүүлэн суулгах ба хиймэл оюун ухааны тусламжтайгаар зүрхний цахилгаан бичлэгийг унших нь” сэдэвт цахим хэлэлцүүлэг зохион байгуулав. Монголын Улсын Нэгдүгээр Төв Эмнэлгийн ерөнхий захирал Б.Хишигжаргал, Тайваний Цэргийн нэгдсэн 3-р эмнэлгийн орлогч дарга Жан Жин Лиан нар хоёр талын холбогдох эмч нартай уулзалт хийж, Тайваний туршлагаас хуваалцаж, харилцан санал солилцов.
Монголын Улсын Нэгдүгээр Төв Эмнэлгийн ерөнхий захирал Б.Хишигжаргал эрхтэн шилжүүлэн суулгах мэс заслын чиглэлээр мэргэшсэн, нэр хүндтэй эмч бөгөөд энэхүү цахим хурлыг зохион байгуулахад дэмжлэг туслалцаа үзүүлсэн Монгол Улс дахь Тайваний төлөөлөгчийн газарт талархал илэрхийлж үг хэллээ. Мөн сүүлийн хоёр жилд шинэ төрлийн коронавирусийн цар тахалтай тэмцэх чиглэлээр тус эмнэлэг шаргуу ажилласан бөгөөд сүүлийн үед Монгол Улсад цар тахлын байдал тогтворжиж, өдөрт ердөө 100 орчим халдварын батлагдсан тохиолдол шинээр бүртгэгдэж байгааг онцоллоо.
Цэргийн нэгдсэн 3-р эмнэлгийн орлогч дарга Жан Жин Лиан хэлсэн үгэндээ “Уг семинарыг хамтран зохион байгуулах завшаан тохиож буйг ашиглан, Монгол Улсын нэгдүгээр төв эмнэлэгтэй цусны үүдэл эс шилжүүлэн суулгах технологи, хиймэл оюун ухааны тусламжтайгаар зүрхний цахилгаан бичлэгийг унших аргачлалыг хуваалцах хүсэлтэй байгаагаа” онцлов. Тэрээр цааш хэлсэн үгэндээ “Тайваньд ч мөн адил сүүлийн үед цар тахлын нөхцөл байдал тогтворжиж байна. Энэ оны сүүлийн хагаст Монгол оронд айлчлахыг тэсэн ядан хүлээж байна.” гэв.
Тайваниас Монгол Улсад суугаа төлөөлөгч Грэйс Ж.Р.Лүө нь “Тайваний Цэргийн нэгдсэн 3-р эмнэлэг болон Монголын Улсын Нэгдүгээр Төв Эмнэлэгтэй хамтарсан энэ удаагийн цахим хэлэлцүүлгийг зохион байгуулахад туслалцаа үзүүлсэндээ баяртай байна. Хоёр талын эмнэлгүүд 2018 оны сүүлчээр хамтын ажиллагааны санамж бичигт гарын үсэг зурсан бөгөөд цаашид ч эрүүл мэнд, эмнэлгийн хамтын ажиллагааг гүнзгийрүүлэн хөгжүүлэх болсонд баяртай байна.
Тайвань, Монголын эрүүл мэнд, эмнэлгийн салбар дахь харилцаа, хамтын ажиллагаа нягт байсаар ирсэн. Тайвань нь нийт 1,000 гаруй Монгол эмч нарыг сургалт хөтөлбөрт хамруулахад туслалцаа үзүүлж, урт хугацааны турш эмнэлгийн тоног төхөөрөмж хандивлаж, Тайваний өндөр чанартай эмчилгээ, цар тахлаас урьдчилан сэргийлэх туршлагаас хуваалцаж байна. Тус төлөөлөгчийн газар нь Тайвань, Монголын эрүүл мэндийн салбарын хамтарсан арга хэмжээг цаашид үргэлжлүүлэн зохион байгуулж, “Тайвань тусалж чадна, Тайвань тусалж байна” гэсэн үзэл санааг батлан харуулах болно.” хэмээв.
